PREGARIA POLA MORTE DUN NENO

Un Luzbel de ouro
Invadiu a terra,
Negros morcegos suicídanse
Deixándose caer no baleiro.

¡Silencio…de fame
Morreu un neno!

Sombras agonizantes
Claman  seus limbos exhaustos.
¡o seu reflexo resucita
Tódolos invernos!

¡Silencio…de fame
Morreu un neno!

As rosas ámanse na escuridade
Das almas, buscando o remanso
Interior da angustia,
Invocando a voces o pequeno.

¡Silencio…de fame
Morreu un neno!

A noite morre estrangulada
Nas brancas ruelas,

A aurora vela o seu corpo
Nas marxes do ceo

¡Silencio…de fame
Morreu un neno!